ગાંધીનગરમાં ગુરુવારે યોજાયેલી કેબિનેટ બેઠકમાં રાજ્ય સરકારે મોટા નિર્ણયની જાહેરાત કરી છે. મુખ્યમંત્રી ભૂપેન્દ્ર પટેલની અધ્યક્ષતામાં યોજાયેલી બેઠકમાં રાજ્યમાં નવા 17 તાલુકા બનાવવા માટે સૈદ્ધાંતિક મંજૂરી આપવામાં આવી છે. સ્થાનિક સ્વરાજ્યની આવનારી ચૂંટણીઓ પહેલાં લેવાયેલો આ નિર્ણય વહીવટી વિકેન્દ્રીકરણ અને જનસુવિધા વધારવા માટે મહત્વપૂર્ણ માનવામાં આવી રહ્યો છે.
2013 પછી પહેલીવાર એટલી મોટી સંખ્યામાં તાલુકા
વર્ષ 2013માં તત્કાલીન મુખ્યમંત્રી નરેન્દ્ર મોદીએ 23 નવા તાલુકાની રચના કરી હતી. તે પછી પહેલીવાર સૌથી વધુ 17 તાલુકાની રચના થવા જઈ રહી છે. નવા તાલુકાઓ ઊભા થતાં ગામડાં અને અંતરિયાળ વિસ્તારમાં રહેતા લોકોને નાનાં–મોટાં સરકારી કામ માટે જિલ્લામથક સુધી લાંબી મુસાફરી નહીં કરવી પડે.
પ્રજાહિતના અભિગમથી નિર્ણય
રાજ્ય સરકારના પ્રવક્તા મંત્રી ઋષિકેશ પટેલે જણાવ્યું હતું કે નવા તાલુકા બનવાથી સામાજિક, આર્થિક, આરોગ્ય, શિક્ષણ સહિતની વિવિધ સુવિધાઓ નાગરિકોને નજીકમાં જ મળશે. વહીવટી માળખું મજબૂત બનશે અને વિકાસનાના કાર્યોમાં ગતિ આવશે.
વાવ–થરાદ જિલ્લાની રચના પણ
બનાસકાંઠા જિલ્લાના છ તાલુકા – વાવ, થરાદ, સુઈગામ, ભાભર, દિયોદર અને લાખણીને જોડીને નવા વાવ–થરાદ જિલ્લાની રચના કરવાનો નિર્ણય પણ કેબિનેટે મંજૂર કર્યો છે. થરાદને નવા જિલ્લાના મુખ્ય મથક તરીકે નક્કી કરવામાં આવ્યો છે.
વિકાસશીલ તાલુકાઓની સંખ્યામાં વધારો
હાલ રાજ્યમાં 51 વિકાસશીલ તાલુકા છે. નવા તાલુકાઓ ઉમેરાતા તે સંખ્યા વધીને 61 થવાની છે. આ તમામ તાલુકાઓને રાજ્ય સરકારની ગ્રાન્ટ તથા વિકાસ યોજનાઓનો સીધો લાભ મળશે.
અગાઉ 9 નગરપાલિકા મનપા બની
યાદ રહે કે, 2025ની શરૂઆતમાં રાજ્ય સરકારે મહેસાણા, ગાંધીધામ, વાપી, નવસારી, આણંદ, સુરેન્દ્રનગર, નડિયાદ, મોરબી અને પોરબંદરને મહાનગરપાલિકાનો દરજ્જો આપ્યો હતો. આ નિર્ણય પછી રાજ્યમાં મહાનગરપાલિકાની સંખ્યા 17 થઈ ગઈ છે.
ટૂંક સમયમાં જાહેરનામું
પ્રવક્તા મંત્રીએ જણાવ્યું કે નવા તાલુકા અંગેનું વિધિવત જાહેરનામું ટૂંક સમયમાં પ્રસિદ્ધ થશે. આ નિર્ણયથી સ્થાનિક સ્તરે વિકાસની ગતિ તેજ થવાની સાથે નાગરિકોને રોજિંદા સરકારી સેવાઓ માટે વધુ સુવિધા પ્રાપ્ત થશે.