સુરેન્દ્રનગર જિલ્લાના પ્રસિદ્ધ યાત્રાધામ ચોટીલામાં ગુજરાતની પહેલી ફ્યુનિક્યુલર રાઈડ બનાવાઈ રહી છે. આ સુવિધાથી મા ચામુંડાના દર્શન માટે આવનારા ભક્તોને હવે ડુંગરના લાંબા પગથિયાં ચઢવાની જરૂર નહીં રહે. માત્ર પાંચ મિનિટમાં જ ભક્તો ડુંગરની ચોટી પર પહોંચી શકશે. હાલ પ્રોજેક્ટનું અંદાજે 30 થી 35 ટકા કામ પૂર્ણ થઈ ગયું છે અને આગામી ચૈત્ર નવરાત્રી સુધી પ્રોજેક્ટ કાર્યરત થવાનો આશાવાદ વ્યક્ત કરવામાં આવ્યો છે.
કેવી રહેશે સુવિધા?
આ ફ્યુનિક્યુલર સિસ્ટમ ડુંગરના પગથિયાંની બાજુમાં 20 ફૂટ વિસ્તારમાં કાર્યરત રહેશે. અહીં કુલ 12 કોચ રહેશે, જેમાંથી 6 ઉપર જશે અને 6 નીચે આવશે. એક કોચમાં છ યાત્રાળુઓ બેસી શકશે. આ માટેનો ભાડો ટ્રસ્ટ દ્વારા રૂ.30 સાથે જીએસટી નક્કી કરવામાં આવશે. સાથે સાથે મંદિરમાં ચઢાવવાનું સામાન પણ હવે આ કોચ મારફતે સરળતાથી ઉપર લઈ જવાઈ શકશે.
ભક્તો માટે વિશેષ રાહત
વૃદ્ધો, અસક્ત અને બીમાર યાત્રાળુઓ માટે આ વ્યવસ્થા ખૂબ જ ઉપયોગી બનશે. પ્રોજેક્ટ પૂર્ણ થયા બાદ લાખો શ્રદ્ધાળુઓને આ નવી સુવિધાનો લાભ મળશે. ટ્રસ્ટ તરફથી આ પ્રોજેક્ટના લોકાર્પણ માટે વડાપ્રધાન નરેન્દ્ર મોદીને આમંત્રણ આપવા અંગે પણ વિચારણા ચાલી રહી છે.
યાત્રાધામમાં ભક્તોની ભીડ
ચોટીલાના ડુંગર પર દરરોજ સરેરાશ 7 થી 10 હજાર લોકો દર્શન માટે આવે છે. ચૈત્ર નવરાત્રી દરમિયાન આ આંકડો બેથી અઢી લાખ સુધી પહોંચી જાય છે, જ્યારે દિવાળી પછીના દિવસોમાં અંદાજે પાંચ લાખથી વધુ ભક્તો અહીં દર્શન કરવા આવે છે. વર્ષમાં ભાઈબીજ અને પૂનમના દિવસો પર તો અહીં અનોખી ભીડ જોવા મળે છે.
ઐતિહાસિક મહત્વ ધરાવતું ચોટીલાનું ધામ
મા ચામુંડા 64 જોગણીઓ પૈકીની એક શક્તિરૂપે અહીં પ્રગટ થઈ હતી. લોકકથાઓ મુજબ, ચંડ-મુંડ નામના રાક્ષસોનો નાશ કરીને માતાજી અહીં ચંડી અને ચામુંડા સ્વરૂપે બિરાજમાન થયા. આજ સુધી ભક્તો માતાજીનાં દ્વારે પોતાનો દુઃખ-કષ્ટ દૂર કરવા માટે પહોંચે છે.
પૂનમ પર વિશાળ પગપાળા સંઘો
દર પૂનમના દિવસે સમગ્ર ગુજરાતમાંથી યાત્રાળુઓ રથ અને પગપાળા સંઘો લઈને ચોટીલા પહોંચે છે. રસ્તામાં સેવાભાવી સંસ્થાઓ પાણી, નાસ્તો અને ભોજનની વ્યવસ્થા કરે છે. ખેડૂતો પોતાના ખેતરોમાં યાત્રાળુઓને આરામ તથા રાત્રિ રોકાણ માટે જગ્યા આપે છે, જેના કારણે આ યાત્રાધામમાં ભક્તિ અને સેવા બંનેનું અનોખું સંયોજન જોવા મળે છે.